Elkarren arteko laguntza da terapia tradizionalaren alternatiba bat. Laguntza mota honetan ez dago osasun mentaleko profesionalik (ez behintzat zuzenean inplikatuta). Bata bestea laguntzean datza, horizontaltasunetik eta berdintasunetik, terapeuta-pazientea hierarkiaren desberdintzapenik gabe.

​

Hainbat arrazoirengatik sortu da laguntza mota hau: osasun mentaleko kontsultetan edo zentroetan zenbait tabu-gai landu ahal ez izateagatik, profesionalekin esperientzia txarrak izateagatik edota esperientziak modu hurbilago batean partekatzeko beharragatik. Beste arrazoi garrantzitsu bat da ez direla osasun mentaleko arazoak indibidualizatu behar; hau da, osasun mentalak ez du izan behar norberak kudeatu beharreko zerbait, kontuan hartu behar baita pertsona bakoitzaren inguruak izugarrizko eragina duela bere osasun mentalean.

​

Elkarren arteko laguntza hainbat modutakoa izan daiteke. Informala izan daiteke, adibidez, lagunen arteko elkarrizketetan; edo modu egituratuagoan, esaterako, talde antolatuetan. Talde antolatu horiek «elkarren arteko laguntzarako taldeak» edo «ELT» deitzen dira.